Pantet et le chemin de fer ( Patois vaudois )
HISTOIRE en patois vaudois
Trouvé dans "100 ans de de chemin de fer dans la Broye"
PANTET ET LO TSEMIN DE FAI (Tiré du Conteur Vaudois du 7 février 1880)
Quand l'est qu'on a volliu férè lo premi tsemin dè fâi dein la Brouïe, l'a
faillu dâi commisséro po vouâiti la pliace iô lo volliavont férè passâ, et
marquâvont cein avoué dâi grantès boutsès que mettiont dâi petits drapeaux
âo bet. On dzo que pliantavont clliâo pequiets, l'arrevont ein drâite
ligne dévant la porta dè grandze à Dâvi Pantet, et ma fâi, vo peinsâ bin
que po on tsemin dè fâi, n'iavâi pas moïan dè bailli lo contor pè derrâi la
courtena ; faillâi traci âo drâi et n'est pas po'na cambuse coumeint clliâ
à Davi que sè volliâvont arretâ.
Assebin lâi criàront:
- Hé, pére Pantet, veni vâi no z'âovri voutra porta dè grandze !
- Que lâi volliâi-vo allâ férè ?
- Ah ! ma fâi, no fein .on traci po lo tsemin dè fâi, et dussè passâ quie.
- Dâo diablio!
- N'ia pas moïan autrameint. Et pi, d"ailleu, vo lâi volliâi onco gagnî, kâ
on pâyè adrâi bin clliâo su quoui yè passè.
- Eh bin !... ne dia pas na, se cein va dinsè, se repond Davi, ma vo lo
dia tot net: ne faut pas vo z'émaginâ que ye vu restâ dzor et né po âovri
et cotâ la porta ti lè yadzo que cé tsemin dè fâi passéra : n'é pas lo teimps !